2026 жылғы 15 қазан күні Түркістан облысы бойынша ҰҚК Шекара қызметі департаментіне қарасты Мақтаарал шекара басқармасының «Қоғалы» шекара бөлімшесі мен Жетісай ауданы білім бөлімінің бірлесуімен, Дінмұхамед Қонаев атындағы №9 ІТ мектеп-лицейі КММ-нің Бастапқы әскери және технологиялық даярлық пәнінің әскери-патриоттық тәрбие жоспарына сәйкес ашық есік күні ұйымдастырылды.
Іс-шара барысында шекара бөлімшесі бастығының орынбасары лейтенант Рсай Абай Мұсаханұлы және БӘТД пәнінің оқытушы-ұйымдастырушысы сержант Е. Оралов «Жас Айбын» әскери-патриоттық клубының мүшелерін шекара бөлімшесінің күнделікті тұрмыс-тіршілігімен, әскери қызметшілердің жатын орындарымен, қару-жарақтарымен және әскери техникасымен таныстырды.
Сонымен қатар, іс-шараға арнайы шақырылған Қазақстан Республикасы ҰҚК Академиясының курсанттары Әділ Сапарбек Әлібекұлы мен Серік Қасымхан Жеңісбекұлы оқушыларға Академияға оқуға түсу тәртібі жөнінде үгіт-насихат жұмыстарын жүргізді.
Ашық есік күні аясында «Жас Айбын» клубының мүшелері шекара бөлімшесінде салтанатты түрде ант қабылдады.
Оқушылар іс-шарадан зор әсер алып, көңіл-күйлері көтерілді. Олардың Отанға деген патриоттық сезімдері арта түсіп, болашақта әскери қызмет атқаруға деген ынта-жігерлері байқалды.
